Instrukshon finansiero i CHE-COHO: “Inhustisia sin presedente”

Willemstad, 18 yanüari 2021. Kabinet Rutte III a entregá su retiro dia 15 di yanüari último komo konsekuensia di un rapòrt titulá “Ongekend Onrecht” (Inhustisia sin presedente) tokante supsidio pa yu (kindertoeslag). Un investigashon parlamentario a yega na konklushonnan durísimo ku a obligá e gobièrnu baha. Tantu e lei ku Parlamento mes a pasa, komo e manera kruel i sin kompashon di Kabinete Rutte pa ehekutá e lei, i riba dje e fayo di wes pa protehá suidadano, tur pa añanan largu a ser konsiderá un violashon di prinsipionan fundamental di un estado di derecho. E ehekushon di parti di gobièrnu, spesialmente di servisio di impuesto, a tuma lugá sin niun bista pa posibel konsekuensianan individual i ademas wes a apliká e lei inesesariamente severo. A pèrde e ser humano kompletamente for di bista.

Instrukshon finansiero i inhustisia sin presedente

Ta bon pa nos para ketu awor i konstatá, ku e mésun inhustisia akí a sosodé serka nos. E instrukshon na 2019, pa Kòrsou baha gastu riba presupuesto den 3 aña, en bes di den 5 aña manera nos a proponé, ta di e mésun kabinete. No obtante ku IMF i Cft a konsehá pa duna Kòrsou mas tempu, gobièrnu Ulandes a insistí i tene su man duru. Baha gastu den tres aña sinembargo lo a mishi direktamente ku nos bienestar. E lo tabatin konsekuensia masha duru pa tur fundashonnan den kuido, tantu pa e kliente komo pa e trahadó, kontratista, etc, esta pa e servisionan ku gobièrnu ta kumpra. Lo e la nifiká tambe ménos tempu pa nos ahustá i mas hende lo a pèrdè trabou. Pero danki Dios ku aki Raad van State a mustra gobièrnu Ulandes, ku Kòrsou ta outónomo i ku ta gobièrnu di Kòrsou ta disidí riba e periodo adekuá pa balansá su presupuesto. gobièrnu ulandes sinembargo a keda persistí den su manera sin kompashon pa atendé ku nos komo pueblo i a pidi Raad van State pa rekonsiderá su desishon i pa di dos biaha Raad van State mester a mustra gobièrnu di Ulanda ku e no tin rason.

CHE-COHO: inhustisia sin presedente

Ora e pandemia mundial di Covid 19, ku a kibra ekonomianan mundial, a presentá, Hulanda a probechá e momentu mas difísil den historia di Kòrsou, pa eksigí mas medida atrobe. Un órgano di gobernashon independiente ulandes (Zelfstandig bestuursorgaan -ZBO), yama engañosamente: Caribisch Hervormings Entiteit (CHE) mester a bai tuma medidanan sin presedente na Kòrsou. Despues a purba tira santu den nos wowo i kambia su nòmber den Caribische Ontwikkeling en Hervormings entiteit (COHO). Puru kosmetika. E entidat hurídiko akí ta traha según lei ulandes, ku tareanan idependiente i ketubai ta gobièrnu Ulandes ta nombra su miembronan. Nada di kontenido no a kambia, tres persona na Ulanda ta formulá i ehekutá medidanan ku lo generá un inhustisia sin presedente pa nos pueblo. PIN ta invitá bo, pa bo mes tuma nota di e “Landenpakket” ku na ke ehekutá, kaminda nan ta papia di – hiba nos na un norma Karibense – na moda ku nos no sa, si ta konforme Venezuela, Haiti òf kua otro isla den Karibe nan lo ke pa nos bira. Ta e intenshon tambe pa baha salario di empleado di gobièrnu i di penshonado di gobièrnu, pa djis menshoná un medida ku ta afektá un grupo grandi, loke lo kondusí na muchu mas pobresa ku awor ya tin den nos komunidat kaba. Baha salario ke men baha forsa di kompra, lokual ta trese aun mas pobresa.

Stòp medidanan kruel, sin kompashon i sin presedente

PIN ta spera ku kaída di gobièrnu ulandes ta pone, tantu gobièrnu Hulandes komo gobièrnu di Kòrsou, realisá ku e konklushonnan di e rapòrt “Ongekend Onrecht”, ta aplikabel riba nos situashon i manera ku e organisashon di CHE-COHO a keda ankrá den e Akuerdo Polítiko di novèmber 2020. E tambe ta un inhustisia sin presedente, apliká sin kompashon i demasiado severo. Kiko un entidat hurídiko Ulandes, di tres persona, ku ta biba 9000 kilometer mas leu i ku no tin ningun responsabilidat ante parlamento (lesa: pueblo) di Kòrsou, sino solamente na gobièrnu ulandes lo hasi pa nos? Si na Ulanda mes a implementá medidanan kruel i sin kompashon, ta kiko lo para di nos pueblo, si nos no resistí CHE-COHO?

Alternativa pa CHE-COHO

PIN a formulá un alternativa, esta pa paisnan Kòrsou, Aruba i Sint Maarten, traha huntu ku Ulanda i atendé e reformanan nesesario di forma mas balansá. PIN ke mas hustisia, kompashon i un alternativa a base di rèspèt mutuo.

Pa mas informashon riba e komunikado aki: Suzy Römer, lider polítiko di Partido PIN