Segun PIN: gobièrnu i parlamento ta un lam un siegu! Koalishon ta nabegá den e triángulo di blunder, desepshon i káos..

Willemstad — Ya ta mas ku un siman ku un frakshon a puntra státus di e lei di kanabis medisinal. E minister a manda un kontesta fofo den un programa di televishon. Ora e mes minister ei a pega barku ku likidashon di BZV, parlamento a pidi klaridat atrobe. E biaha aki minister ke laba su man ku un simpel reunion na su sede i algun deklarashon na radio splikando ku e la bin pa siña. Minister di finansa ta goberná via Facebook sin supstansiá nada dilanti representante di pueblo. Riba ‘uitvoeringsagenda’ mes ta reina un silensio profundo for di kamber di promé minister. Tur esei ta pasa miéntras parlamento, den su mayoria, ta pegá den e ròl di sinta mira. Pues no por bisa otro ku gobièrnu i mayoria di parlamento ta un lam, un siegu. Opservando esaki Partido PIN ta ripití: a pasa ora pa fiha direkshon pa nos pais. Esei tin ku sosodé den parlamento, no na sede, no den komunikado, no den konferensia di prensa, ni tampoko den notisia òf talk show. Un lam un siegu Partido PIN ta ferwagt dje parlamentario mayó, esta sra. Eduarda, ku e ta pone e preshon debido pa ministernan duna kontesta den parlamento riba asuntunan ku realmente ta toka struktura i futuro di nos pais. Un bon ehèmpel di un asuntu asina ta kontesta riba státus dje lei pa fasilitá produkshon di kanabis medisinal. Parlamento ta bai keda kontentu ku minister su kontesta lali lali na un programa di televishon manera a sosodé? Ta for di studionan na Rooseveltweg desempleadonan mester skucha ku ta tira míles di oportunidat di trabou den koi sushi? No ta na Wilhelminaplein un minister mester klarifiká su maneho of falta di maneho? Meskos ta konta pa e pasonan deskabeyá di e minister di finansa. Mayoria di parlamento ta aseptá ku ta pasa riba su kabes pa tende e minister splika den un konferensia di prensa ku bon mirá e tin lunas ta drumi riba e asuntu di ‘duurtetoeslag’? E profeshonalnan di Inspekshon di Impuesto a indiká ku falta ‘contra- informatie’ pa e sistema outomatisá di impuesto funshoná bon. E minister a skohe pa bati nan den un show televisá, na lugá di bin splika parlamento di kon e no a traha riba e struktura pa haña ‘contra-informatie’. Mayoria di parlamento ta aseptá esei numa? Aya banda minister di ekonomia sr. Cijntje, den mes rosea ku e ta amplia makutu básiko, ta deklará ku no por hasi mashá ku preisnan den rèki paso gobièrnu lo pèrdè di gana ingreso adishonal for di OB. Parlamento den su mayoria ta aseptá ku un minister ke usa oumento di preis mundial pa drecha pará di gobièrnu riba lomba di 20-piku porshento di desempleado mei mei den krísis? E no mester bin splika esei den e sala di parlamento? Rèspèt pa votadó Den tur sentido ta opvio ku gobièrnu no ta komprendé e situashon, anto parlamento tampoko sa di imponé e rèspèt komo representante di pueblo. Parlamentarionan por kritiká minister sra. Janga i su koleganan henter dia riba Facebook, den app i na radio i televishon, pero parlamento en general i sigur su presidente tin ku duna su mes tambe un sertifikado di inkapasidat si e no por sikiera pone ministernan bin parlamento i saka kontesta formal for di nan, sintá na Wilhelminaplein. Pesei Partido PIN no por sinti otro ku gobièrnu i parlamento en general ta un lam, un siegu.