Maneho di Gobièrnu pa ku formashon di trahadó den sektor hotelero

Kòrsou, 8 desèmber 2021
Despues di un periodo di kaida ekonómiko pisá debí na e pandemia di Covid-19 nos ta notando ku
Kòrsou su área di konstrukshon ta lantando kabes atrobe. Por mira varios kaminda konstrukshonnan
serio ta tuma lugá, en partikular den e sektor hotelero. Si tira un bista den un “nutshell” te ku aworaki
por hasi menshon sigur di e siguiente proyektonan:
● Ekspanshon di Mambo Beach ku e proyekto ONE Mambo ku lo konsistí den su promé fase di
sigur 37 apartamentu di luho;
● Den e área di Sta. Barbara ta transformando loke antes tabata e kompleho gigante di Hyatt den
un hotel super luhoso ku lo karga e nòmber Sandals Royal Curacao;
● Na Penstraat, ku pronto lo start ku un hotel luhoso;
● Na Marichi Majestic hotel ta den tapara;
● Na Kleine Werf den Scharloo e proyekto The Wharf Curacao ta lantando kabes ku tambe lo bai
konta ku por lo menos 130 kamber;
● Na Otrobanda nos tin e loke tabata Hotel Otrobanda den pleno fase di transformashon, tambe
kaminda tabata Howard Johnson ta kedando kla, mientras ku riba e tereno banda di SVB na Rif
Courtyard Marriot ta hañando forma banda di un parke di Mangel ku tambe denter di poko lo
habri tantu pa lokalnan komo turistanan;
● Na Zakitó a start ku e proyekto di High Rise;
I asina tin mas desaroyo den tapara ku sigur lo nifiká un ‘boost’ pa nos ekonomia, kreando riba término
kòrtiku trabou den konstrukshon i tambe generando strukturalmente entrada di belasting pa kaha di
gobièrnu, algu ku sin mas ta nesesario den nos situashon aktual.
Tantu riba término kòrtiku (p.e. den kaso di Sandals), komo riba término mediano i mas largu e desaroyo
akí lo nifiká un apertura pa kuponan di trabou riba tur nivel den e sektor hotelero. E peliger sinembargo
ta ku si nos no antisipá i prepará nos hendenan pa e trabounan akí e hotelnan lo tin ku bolbe bai buska
trahadónan for di eksterior mientras ku nos mes hendenan ta keda ekskluí for di e “bolo” ku e desaroyo
akí ta trese kuné. Den pasado ya esaki a yega di tuma luga debí ku NO tabatin sufisiente trahadónan ku e
preparashon rekerí riba nivelnan di MBO i HBO.
Nos di PIN ta lamentá e parti aki, pasombra nos sa ku na Hulanda tin varios di nos hobennan ku a sigui
studia den e mundu di turismo riba e nivel di MBO I HBO ku por ta di gran aporte pa nos pais. Di otro
banda aki mes nos por tin hendenan ku kisas ainda no tin e preparashon nesesario, pero ku tur potensial
i dotá ku talento i abilidat pa por laborá den sektor basta e oportunidat keda krea.
Pregunta na e ministernan konserní:
● A hasi un investigashon ku nos hobennan ku nivel MBO/HBO na Hulanda ke bini kas bèk pa por
traha den e hotel nan akí ku pronto ta habri nan porta nan?
● A hasi un investigashon ku nos hende nan ku a pèrdè trabou den hotel pa motibu di Covid, kier
bai funshoná den e hotelnan akí?
● A hasi un invistigashon ku nos hende nan sin trabou pa motibu di Covid ta despuesto di wòrdu
re-eduká (her-, om- en bijscholing) pa por traha den e sektor hotelero?
● Kon gobiernu lo bai hisa empleabilidat di nos mes hendenan pa sigurá ku nos propio yunan di
tera ku aktualmente no tin un trabou por haña trabou pa asina baha e preshon di sosten
finansiero for di kaha di gobièrnu?
● Kon ta gobiernu lo bai garantisá ku e benefisionan ku e desaroyanan den sektor hotelero lo keda
mas tantu na Kòrsou i pa adelanto di e pueblo di Kòrsou?
Plan di maneho
PIN ta sugerí pa mas pronto posibel bini ku un plan di maneho interministerial entre SOAW, OWCS i
MEO pa katalisá e proseso di preparashon di nos hendenan pa laborá den e sektor kresiente akí i na mes
momentu tambe mester mara eventual otorgashon di permitnan i terenonan na un obligashon pa duna
prioridat na hendenan lokal i invertí bèk den aspektonan sosial (p.e. aplikando “Corporate Social
Responsibility”). Na nos pareser esaki sigur ta un aspekto ku mester por keda finansiá mediante e
struktura di COHO i e landspakket pa asina por garantisá un ehekushon eksitoso.
PIN ta para pa un pais kaminda tur hende por haña e oportunidat pa alkansá nan máksimo potensial. Un
kondishon basal ta ku e hende akí por tin un trabou digno pa e por biba di dje i sigui desaroyá. PIN ta
urgí gobièrnu pa kana dilanti i ta proaktivo den e desaroyo positivo akí pa nos pueblo, spesialmente
esnan ku ta den nesesidat di un trabou, no bolbe pèrdè e pontensial benefisionan na man di
ekstranheronan.