Awor T’e Ora pa nos usa nos Derechi di Voto Konsiente

Komunikado

Pa publikashon mesora

Kòrsou, 27 yanuari 2021

Título: Awor T’e Ora pa nos usa nos Derechi di Voto Konsiente

Na e momentunan aki pa ami Abigail Paula ta e ora, ku mi ke kompartí e importansia pa hasi nos ko-siudadanonan konsiente. Kòrsou mester di kada un di su yunan pa uni forsa, pa stòp e divishon ku ta reina i pa realmente ban traha pa nos dushi Kòrsou. Basta ku palabra bunita, ban pone man na obra pa adelanto di nos pida baranka.

Awor T’e Ora ku nos mester pone nos atenshon pa ban traha riba un trayekto dirigí spesialmente riba realisashon di e meta pa kaba ku pobresa tur kaminda i den tur forma. Mester kaba ku hamber, i mehorá alimentashon i promové agrikultura duradero, sigurá un bon salú i promové bienestar pa tur edat. Esakinan ta djis algun di e kosnan ku PIN lo pèrkurá p’e asina ku nos ta bek den gobernashon, paso Awor T’e Ora.

Awor T’e Ora ku komo siudadanonan responsabel nos ban vota konsiente. Nos pais ta pasando momentunan sumamente difísil i nos mester komprondé ku awor t’e ora pa para ketu i duna sosten na un partido manera PIN ku a demonstrá ku su akshonnan ta akshonnan ku por midi. Partido PIN a demostrá den un periodo di 3 aña ku nos nó ta papia so, pero nos ta hasi tambe, i a hasi un gran parti di nos komunidat konsiente ku nos no ta duna, pero nos ta siñá. Esta, empoderá e Yu di Kòrsou pa e ta outo-sufisiente. Entre otro a prepara hopi agrikultor nobo i a krea kuponan di trabou, a terminá nos hòspital nobo i hopi mas, i ainda nos ta leu for di kla. A bini ku proyektonan konkreto manera p.e. esun di Cannabis i Kunukito.

P’esei mi kier pidi bo, si di bèrdat bo kier nos pais Kòrsou bon, komprondé ku na e momentunan aki ku pais ta konfrontando diferente reto, nos no por bai enfoká riba ken ta duna bo algu a kambio di bo voto, sabiendo ku ora nan haña stul pa sinta den Gobernashon òf Parlamento nan lo no kòrda riba kiko a primintí. Ban skohe pa stabilidat, eksperensia i union pa nos prosperá. I den esaki PIN i su tim Dotá, i ami Abigail Paula kandidato #2 ta kla pa sirbí nos dushi pueblo.

Awendia tin hopi persona ku ke hasi polítika, pero ku ainda no tin e eksperensia i preparashon ku nos órganonan legislativo i ehekutivo. Hinka nos pais den man di personanan ku no a risibí guia i ta deskonosí ku e aparato, o personanan ku ke realisá plannan grandi sin sa e situashon finansiero prekario di pais òf gruponan ku ta djis sklama gritu pa nos dushi pais bira provinsia òf “copy paste” di paisnan Asiátiko, sin konosé e lucha i sakrifisio berdadero pa alkansá e potensial o nivel di bida aki.

Si bo ta kere ku Kòrsou meresé mihó, Awor T’e Ora ku abo por disidí futuro di nos Pais, para pa nos Kòrsou i no bende bo derecho sagrado ni di firma ni di vota pa esnan ku kier tira pará.

Pa entrevista, yama Abigail Paula